२०८१ फाल्गुन १६, शुक्रबार
काठमाडौं। जनता समाजवादी पार्टी नेपालका अध्यक्ष उपेन्द्र यादवले भूमिसम्बन्धी अध्यादेश पारित गराउन सरकारले सांसद किन्न खोजेको आरोप लगाएका छन् । शुक्रबार जसपा नेपालले अध्यादेशको सम्बन्धमा आयोजना गरेको अन्तरक्रिया कार्यक्रमलाई सम्बोधन गर्दै अध्यक्ष यादवले भूमाफियाहरुले सरकारलाई अर्ब पैसा खर्च गरेर भएपनि सांसद किनेर अध्यादेश पारित गराउन दवाब दिइरहेको बताएका हुन् ।
‘दाउपेच,जालझेल,संसद् खरिदविक्री गरेर,अहिले माफियाहरुले भन्दैछन् रे,सुनेको मैले कति करोड चाहिन्छ ?अर्ब नै चाहिन्छ भनेपनि व्यवस्था गर्छौं । किन्नुस् सांसद र पास गराउनुस् र हामीलाई जंगलको जग्गा दिनुस् भनेर लागेको छन् अरे । त्यो धन्दामा लाग्नुजस्तो देशघाती काम केही पनि हुँदैन,’–उनले भने ।
सरकारले शिक्षाको सु्धार,भूमिलाई आधुनिकीकरण गर्ने,मलखाद, सिचाइँ र विउविजनको प्रबन्ध गर्ने, कृषि उत्पादन बढाउने, गरिबी, बेरोजगारी समस्या समाधान गर्नेतिर ध्यान नदिएर माफियाहरुसँग मिलेर तिनको पैसा लिने, पार्टी फुटाउने र सांसद किन्ने ध्याउन्नमा रहेको उनले बताए । उनले भूमिसम्बन्धी अध्यादेशमा सांसद् खरिद विक्रीको चलखेल भइरहेको उनको आरोप छ ।
सांसद किनबेच गरेर भूमिसम्बन्धी अध्यादेश पारित गराए आफूहरु जनआन्दोलनमा जाने उपेन्द्रको चेतावनी छ ।
