२०८२ जेठ ३०,शुक्रबार
दाङ।साहित्य स्रष्टा सुशील पुन ‘बिरही’ले शुक्रबार घोराहीमा एकल रचना वाचन गर्नु भएको छ।राप्ती साहित्य परिषद दाङ शाखाको नियमित एकल रचना वाचन कार्यक्रम अन्तर्गत ८१ औ शृङखलामा साहित्यकार एंव गजलकार बिरहीले एकल रचना वाचन गर्नु भएको हो।
परदेशी भूमिमा रहदा पनि नेपाली साहित्यलाई निरन्तरता दिदै आउनु भएका बिरहीले जीवन भोगाइ सम्बन्धि रचना वाचना गर्दा कार्यक्रममा सहभागि सबै मन्त्रमुग्ध भएका थिए।
पढियो लेखियो आखिर खाडीमा आइयो
देशले दिएन जागिर खाडीमा आइयो।
मलाई पढाउदा बाले आधा सम्पति सकेथे
अचेल यहि त लाग्छ पीर खाडीमा आइयो।
बच्चादेखि नै शिर झुकाउन नजान्ने म
आज झुकाउदै यो शिर खाडीमा आइयो।
उनकै स्पर्शमा चल्ने यो एकमुठी मुटु
बनाएर अस्थिर खाडीमा आइयो।
ति बुढी आमाका वचनवाणले चस्काइरहन्छन
मुटुमै बोकेर तीर खाडीमा आइयो।
मन बुझाउनै परेपछि अचेल यसरी मन बुझाएको छु
यस्तै त रहेछ तक्दिर खाडीमा आइयो।
यहि गजलबाट रचना वाचन सुरु गर्नु भएका विरहीले दुई दर्जन बढी रचना वाचन गरेर सहभागि सबैलाई सनाउनु भएको थियो।वरिष्ठ साहित्यकार नारायणप्रसाद शर्माको प्रमुख आतिथ्यता एंव राप्ती साहित्य परिषदका केन्द्रिय सल्लाहकार पुरुषोत्तम खनालको विशिष्ट आतिथ्यतामा सम्पन्न भएको कार्यक्रममा बिरहीले २१ वटा गजल,२ वटा कविता,२ वटा मुक्तक र १ वटा भावना वाचन गर्नुभएको थियो।कार्यक्रममा सहभागि प्रमुख अतिथि शर्मा लगायत अन्य सहभागिहरुले बिरहीका रचना र वाचन शैलीललाई मुक्तकण्ठले प्रशंसा गर्नु भएको थियो।
कार्यक्रममा बिरहीलाई प्रशंसा पत्रले सम्मान समेत गरिएको थियो।राप्ती साहित्य परिषद दाङका अध्यक्ष यम रेग्मीको अध्यक्षतामा सम्पन्न भएको कार्यक्रममा परिषदका उपाध्यक्ष सुरेशकुमार पाण्डेले शुभकामना मनतव्य राख्नुभएको थियो भने सहजिकरण सचिव घनश्याम केसीले गर्नु भएको थियो।
