माघ १५,२०८१ मंगलबार
दाङ।लुम्बिनी प्रदेशका मुख्यमन्त्री चेतनारायण आचार्यले प्रदेश सरकारले खेलक्षेत्रको विकास र समृद्धिलाई उच्च प्राथमिकतामा राखेको बताउनु भएको छ ।मंगलबारदेखि अमर मा.वि. उरहरीमा सुरु भएको तुलसीपुर उपमहानगरपालिका स्तरीय छैंठौ राष्ट्रपति रनिङशिल्ड प्रतियोगिताको उछ्घाटन गर्नुहुदै मुख्यमन्त्री आचार्याले समग्र खेलकुद क्षेत्रको विकास गर्नका लागि प्रदेश सरकारले विशेष योजना अघि सारेको बताउनु भएको हो।
खेलकुद क्षेत्रको समग्र विकासलाई प्रदेश सरकारले उच्च प्राथमिकतामा राखेकोछ,’मुख्यमन्त्री आचार्यले भन्नुभयो,‘लुम्बिनी प्रदेशलाई अन्तराष्ट्रिय स्तरको आकर्षणको केन्द्र बनाउनका निम्ति खेल पूर्वाधार विकासको योजनालाई अघि सारेका छौ।’
मुख्यमन्त्री आचार्यले खेल पूर्वाधारको पर्याप्त विकास हुन नसक्दा खेलाडीहरुले भोग्नु परिरहेको समस्यालाई प्रदेश सरकारले गम्भीरतापूर्वक लिएको बताउँदै ती तमाम समस्यालाई समाधान लागि योजना तर्जमा गर्ने गरी योजना निर्माण गर्ने काम भइरहेको समेत बताउनु भयो ।
खेलकुद शारीरिक,मानसिक विकासका लागि मात्र महत्वपूर्ण नभई सामाजिक एकिकरण र समन्वयात्मक भावनाको विकास गर्ने सुत्र समेत रहेको मुख्य मन्त्री आचार्यको भनाई थियो ।
मुख्यमन्त्री आचार्यले खेल पर्यटनका हिसाबले लुम्बिनी प्रदेश निकै प्रचुर सम्भावना बोकेको प्रदेश भएको बताउदै यसको विकास गर्न सके आर्थिक विकासमा थप नयाँ आयाम थपिने बताउनु भयो।
‘लुम्बिनी प्रदेश खेल पर्यटनका हिसाबले निकै सम्भावनका बोकेको प्रदेश हो,’मुख्यमन्त्री आचार्यले भन्नुभयो,‘यसको विकास गर्न सके आर्थिक समृद्धिका थुप्रै आधारहरु निर्माण हुनेछन ।जसले प्रदेश पनि समृद्ध बन्छ।यहाँका नागरिक पनि समृद्ध बन्नेछन।’
नगरस्तरीय राष्ट्रपति रनिङ शील्ड प्रतियोगितामा तुलसीपुरका ४४ विद्यालयबाट १३ सय ६० जना खेलाडीले भाग लिएका छन।माघ १८ गतेसम्म सञ्चालन हुने प्रतियोगिता अवधिभर भलिबल,कपर्दी,दौड,कराँते,हाइजम्म,लङजम्प,सटफुट लगायतका खेलहरु हुनेछन।
