बाँके -बाँकेको जानकी गाउँपालिकाको शिक्षा युवा तथा खेलकुद शाखामा तालाबन्दी गरिएको छ। जानकी ३ करमोहनास्थित श्री नेपाल राष्ट्रिय प्राथमिक विद्यालयले माग गरेको एक जना महिला शिक्षकका लागि लिएको परीक्षा र प्रकाशित नतिजाप्रति धाँधली भएको आरोप लगाउँदै शिक्षाशाखामा तालाबन्दी गरिएको हो।
अखिल क्रान्तिकारी जानकी गाउँपालिका समिति, वाइसियल जानकी र शिक्षका पदकालागि आवेदन भरेका परीक्षार्थीहरुले परीक्षा र नतिजाप्रति असहमति जनाउँदै भदौ २५ गतेका दिन संयुक्त रूपमा तालाबन्दी गरेका हुन्।
उनीहरूले परीक्षा र नतिजाप्रति असहमति जनाउँदै छुट्टाछुट्टै रूपमा प्रेस-विज्ञप्ति र परीक्षा स्थगित गराईपाउँ भनी शिक्षा शाखामा निवेदन समेत पेशगरेको जनाएका छन्।
अखिल क्रान्तिकारी र वाइसियल जानकी गाउँपालिकाको तर्फबाट पेश गरिएको प्रेस-विज्ञप्तिमा क्रान्तिकारी अध्यक्ष विष्णु यादव र वाइसियल ईन्चार्ज विजय वर्माले हताक्षर गरेका छन्। त्यसैगरी परीक्षार्थीका तर्फबाट आवेदन दिइएका आरोही बढही, आरती पासी, पुनमकुमारी यादव, सुजाता ठाकुर, रेखा यादव, सुमित्रा थारु, गीताकुमारी वर्माले परीक्षा स्थगित गराईपाउँ भनी शिक्षा शाखामा निवेदन पेश गरेका हुन्।
उनीहरूका अनुसार उक्त विद्यालयले भदौ २ गते ०१/०८१/०८२ विज्ञापन नं मार्फत एकजना प्रारम्भिक बालविकास शिक्षक (महिला) को माग गरेको र उक्त पदकालागि ८ जना परीक्षार्थीले आवेदन दिएका थिए।
विद्यालयले भदौ २१ गते एक सूचना जारी गर्दै २५ गतेका दिन परीक्षा संचालन हुने जनाएको थियो। परीक्षार्थीहरु परीक्षाका लागि समयमै सम्बन्धित ठाउँमा पुगेको, कुनै तैयारी बिना हस्तलिखित प्रश्नहरु दिएको, तोकिएको समयभन्दा ढाई घन्टा पछि परीक्षा सुरु गर्न लागिएकाले धाधली भएको आशंकामा एकजना बाहेक सातै जना परीक्षार्थीले परीक्षा बहिस्कार गरेका थिए ।
सातै जना परीक्षार्थीले परीक्षा बहिस्कार गर्दा समेत विद्यालयले सोही दिन एकजना मात्र परीक्षार्थी सिता गोसाई कुर्मीको लिखित र मौखिक परीक्षा लिएको र सोहि दिननै अन्तिम नतिजा प्रकाशन गरी एकल परीक्षार्थी कुर्मीलाई उतिर्ण भएको सूचना प्रकाशित गरेको थियो।
