फागुन ०५,२०८१ सोमबार
दाङ।प्रधानमन्त्री केपी शर्मा ओलीले विकासका सन्दर्भमा दाङबासी सामु दुई प्रतिबद्धता व्यक्त गरेका छन।नेकपा एमाले दाङले सोमबार घोराहीमा आयोजना गरेको जनसभालाई सम्बोधन गर्ने क्रममा प्रधानमन्त्री ओलीले लामो समयदेखि अलपत्र घोराही—तुलसीपुर चारलेन सडक र तुलसीपुरको टरिगाउँ एयरपोर्टको वृद्धि विकासका लागि छिट्टै निर्माण कार्यको प्रारम्भ गरिने प्रतिबद्धता जाहेर गरेका हुन ।
प्रधानमन्त्री ओलीले यी दुई अलपत्र आयोजनाको विषयमा आफू जानकार रहेको बताउँदै तत्काल पुनःनिर्माणको कार्यलाई अघि बढाईने बताए।६ वर्षदेखि अलपत्र घोराही—तुलसीपुर चारलेन सडकको निर्माण हुन नसक्दा दाङबासीले निकै सास्ती व्यहोर्दै आइरहेका छन।
‘दाङको विकाससंग जोडिएको घोराही—तुलसीपुर चारलेन सडकको अवस्थाको बारेमा म जानकार छु,‘प्रधानमन्त्री ओलीले भने,’तपाईहरु ढुक्क हुनुहोस्।यो अलपत्र सडकको निर्माण कार्य छिट्टै प्रारम्भ हुनेछ।म तपाईहरु सामु प्रतिबद्धता जाहेर गर्दछु।’
प्रधानमन्त्री ओलीले सम्बोधनका क्रममा तुलसीपुरको टरिगाउँ एयरपोर्टको विकास पनि उच्च प्राथमिकतामा रहेको बताए।उनले एयरपोर्टको विकास लागि आगामी आर्थिक वर्षमा बजेटको सुनिश्चितता गरिने प्रतिबद्धता व्यक्त गरे।त्यस्तै प्रधानमन्त्री ओलीले देश सुरुङ मार्गको यूगमा प्रवेश गरिसकेको बताउँदै अबको सडक निर्माण त्यसैमा केन्द्रित हुने समेत बताए।
उनले दाङको घोराही र देउखुरी उपत्यकालाई जोड्ने गरी सुरुङ मार्गको निर्माण गर्न सकिने बताउँदै त्यसका लागि आफूले विशेष योजना ल्याउने बताए।उनले भने,‘मैले रेल,पानीजहाज,सुरुङ मार्गको योजना अघि सार्दा धेरैले हाँसीमजाकमा उडाए।कतिले खिसीटिउरी गरे।अहिले सुरुङ मार्गमा ब्रेक थ्रु भइरहेका छन।’
