काठमाडौं — नेपाली कांग्रेसले पूर्व केन्द्रीय सदस्य, पूर्व मन्त्री तथा समाजवादी चिन्तक ढुण्डिराज शास्त्रीको निधनप्रति गहिरो दुःख व्यक्त गर्दै तीन दिन शोक मनाउने निर्णय गरेको छ।
आज बसेको पार्टीको आकस्मिक केन्द्रीय कार्यसमिति बैठकले शास्त्रीको निधनमा शोक प्रस्ताव पारित गर्दै असार ४, ५ र ६ गते केन्द्रीय, प्रदेश र जिल्ला कार्यालयहरूमा पार्टीको झण्डा आधा झुकाउने निर्णय गरेको हो।
साथै, असार ५ गते देशभरका पार्टी कार्यालयहरू बन्द गर्ने, १३ दिनसम्म शोक पुस्तिका राख्ने र १३औं दिनमा सम्बन्धित जिल्लामा शोकसभा आयोजना गर्ने निर्णय गरिएको पार्टीका मुख्यसचिव कृष्णप्रसाद पौडेलले जानकारी दिए।
नेता शास्त्रीको यही असार २ गते काठमाडौं मेडिकल कलेजमा ८९ वर्षको उमेरमा निधन भएको थियो। बैठकमा एक मिनेट मौन धारण गर्दै उहाँको आत्माको शान्तिका लागि कामना गरिएको थियो।
शास्त्रीले विद्यार्थी जीवनदेखि कांग्रेसको राजनीतिमा सक्रिय भूमिका निभाउँदै प्रजातन्त्र पुनःस्थापनाको आन्दोलनमा जेल जीवन बिताउनुका साथै लामो समय भारतमा निर्वासित जीवन पनि बिताएका थिए।
उनी जननायक विपी कोइरालाका अनुयायी, समाजवादी विचारक तथा प्रजातान्त्रिक समाजवादका व्याख्याकार समेत थिए। अर्घाखाँचीको किमडाँडामा वि.सं. १९९३ जेठ २५ गते जन्मिएका शास्त्री २०४८ र २०५१ सालको आमनिर्वाचनमा अर्घाखाँची क्षेत्र नं. २ बाट प्रतिनिधिसभा सदस्यमा निर्वाचित भएका थिए।
पार्टीले नेता शास्त्रीप्रति उच्च सम्मान प्रकट गर्दै राष्ट्र, लोकतन्त्र र समाजवादप्रतिको उहाँको निष्ठा, योगदान र नेतृत्व सदा स्मरणीय रहने उल्लेख गरेको छ।
आजै कांग्रेस सभापति एवं पूर्वप्रधानमन्त्री शेरबहादुर देउवाले सानेपास्थित पार्टी कार्यालयमा शास्त्रीको पार्थिव शरीरमा माल्यार्पण गर्दै पार्टीको झण्डा ओढाएर श्रद्धाञ्जलि अर्पण गरे।
महामन्त्री गगन थापा, कृष्णप्रसाद सिटौला, विमलेन्द्र निधि, डा. शशांक कोइराला, गोपामान श्रेष्ठ, डा. मीनेन्द्र रिजाललगायत नेताहरूले पनि स्व. शास्त्रीप्रति श्रद्धाञ्जलि व्यक्त गरेका थिए।
पार्टी कार्यालयका अनुसार शास्त्रीको अन्त्येष्टि आजै पशुपतिस्थित आर्यघाटमा गरिनेछ।
