बैशाख १४,२०८२ आइतबार
दाङ ।दाङको एक वडा कार्यालयले विद्यालय सुचारु गर्न निर्देशन दिएको छ।
तुलसीपुर उपमहानगरपालिका वडा नं.१३ ले आइतबार सूचना प्रकाशित गर्दै भोली(सोमबार)देखि नियमित रुपमा विद्यालय सुचारु गर्न निर्देशन दिएको हो ।वडाध्यक्ष मोहनलाल पौडेलद्घारा हस्ताक्षरीत सूचनामा भनिएको छ,‘वडा अन्तर्गतका केही सामुदायिक विद्यालयहरुमा बैशाख १४ गतेसम्म पनि विद्यार्थी भर्ना,पाठ्यपुस्तक वितरण र पठनपाठन संचालन नभएको जनगुनासो आएको हुँदा ती सबै काम बैशाख १५ गतेदेखि सूचारु गरि पठनपाठन नियमित रुपमा सञ्चालन गर्न निर्देशन गरिन्छ ।’
बालबालिकाको पढ्न पाउने नैसर्गिक अधिकार हनन् गर्ने छुट कसैलाई नभएको भन्दै वडाले त्यस तर्फ समेत सचेत गराएको छ । वडा कार्यालयको निर्देशन कार्यान्वयन भए/नभएको विषयमा अनुगमन समेत गरिने वडाध्यक्ष पौडेलले बताए ।निर्देशन पालना नगर्ने विद्यालयहरुलाई वडा कार्यालयबाट हुने कुनै प्रकारको सहयोग नहुने वडाध्यक्ष पौडेलले बताए।संघीय शिक्षा ऐन जारी गर्न माग गर्दै चैत २० गतेदेखि शिक्षक/कर्मचारीहरु आन्दोलनमा केन्द्रित हुँदा विद्यालयको सम्पूर्ण काम काज ठप्प रहेका छन।
