चैत २५,२०८१,सोमबार
काठमाडौँ । नेपाल विद्यालय कर्मचारी परिषदले हाल काठमाण्डौमा जारी शैक्षिक आन्दोलनमा सहभागि हुन आह्वान गरेको छ ।
परिषदका अध्यक्ष गंगाराम तिवारी र महासचिव शान्तिनाथ योगीले विज्ञप्ति जारी गर्दै नेपाल शिक्षक महासंघको अगुवाइमा संघीय राजधानीमा जारी आन्दोलनमा सहभागि हुन सम्पूर्ण विद्यालय कर्मचारीहरुलाई आग्रह गरेका हुन । विद्यालय शिक्षा ऐन तत्काल जारी गर्न माग गर्दै नेपाल शिक्षक महासंघ र विद्यालय कर्मचारी परिषदले संयूक्त रुपमा चैत २० गतेदेखि काठमाण्डौ केन्द्रित आन्दोलन जारी राखेका छन ।
आन्दोलनलाई थप शसक्त र प्रभावकारी बनाउन सम्पूर्ण विद्यालय कर्मचारीहरुलाई आन्दोलनमा सहभागि हुन अपिल गरिएको अध्यक्ष गंगाराम तिवारीले बताए । चरणबद्ध आन्दोलनमा होमिएका शिक्षक÷कर्मचारीहरुले आइतबार सरकारलाई पेचिलो दबाब दिन भन्दै सिट्ठी जुलुस प्रदर्शन गरेका थिए । सरकारले शिक्षा ऐन जारी नगरेसम्म आन्दोलन निरन्तर रुपमा अघि बढ्ने अध्यक्ष तिवारीले बताए ।
निर्णायक आन्दोलनमा ‘कामाण्डौं जाऔं’ भन्ने अभियानमा जोडिन सबै कर्मचारीहरुलाई आग्रह गरिएको उनले बताए।महासंघले आन्दोलनलाई अझै पेचिलो बनाउन आजदेखि अनिश्चितकालीन शैक्षिक आमहड्तालको घोषणा गरेको छ । शिक्षकहरुको आन्दोलनका कारण एसईई परीक्षाको उत्तरपुस्तिका जाँच लगायत विद्यालयका सम्पूर्ण कामकाज समेत प्रभावित बनेको छ ।
