अरुणकुमार नेपाली
१६ असार २०८० शनिबार
दाङ—तल्लो जातको भन्दै डेरामा बस्दै आएका दुईजनालाई घरबाट निकाल्ने घरधनिलाई दाङ प्रहरीले शनिबार पक्राउ गरेको छ। जिल्ला प्रहरी कार्यालय दाङका प्रहरी नायब उपरीक्षक राजन गौतमका अनुसार घोराही उपमहानगरपालिका वडा नं. १७ का ताराप्रसाद पोखरेललाई पक्राउ गरी अनुसन्धान थालिएको छ।पीडितले दिएको जाहेरीको आधारमा पोख्रेललाई प्रहरीले पक्राउ गरेको हो ।
पोखरेलले आफ्नो घरमा भाडामा बस्दै आएका अछाम पञ्चदेवल विनायक नगरपालिका– ७ पुल्तोलाका महेन्द्र बिक र हुम्लाको अदानचुली गाउँपालिका– ३ का अंगराज नेपालीलाई डेराबाट निकालेका हुन। ‘तिमीहरू कामी(तल्लो जातको) रहेछौ, घरमा आएदेखि म बिरामी छु भन्दै घरबाट घरबेटीले निकालिदिनुभयो,’ पीडित महेन्द्र बिकले भने।
सो घरमा नेपालीसँग तीनजना एउटा कोठामा बस्थे भने महेन्द्रको परिवार अर्को कोठामा बस्थे। शुक्रबार साँझ नै घरबेटी पोखरेलले यस्तो व्यवहार गरेको प्रहरीले बताएको छ।
प्रहरीले जातीय छुवाछुतअन्तर्गत मुद्दा दर्ता गरी कारबाही गर्ने तयारी गरेको छ। यसैबीच प्रेस सेन्टर दाङ, दलित पत्रकार संघ दाङ लगायत विभिन्न संघसंस्थाले विज्ञप्ति जारी गरी दोषीमाथि कारबाहीको माग गरेका छन्।
